يا ناس يا حشرية
ماتخللي عندكوا دم شوية
مش لازم كل حاجة تحصل ليا
يكون عندكوا بيها إخبارية
ده إيه القرف والعكننة ديه
الواحد مايعرفش يعيش أبداً شوية
من غير ما تتدخل في حياته ولية
تفضل تسأله أسئلة وتعمل فيها بلطجية
إنتوا فاكرين نفسكوا عايشين في أنهي ألفية
طريقة أبلة نظيرة دي والله ماهتأثر فيا
وعلى فكرة ممكن أقلبهالكوا حرب دموية
لو ماسبتونيش في حالي الساعة ديه
كنت قاعدة مرة مع الست فتحية
جارتنا دي الست الحشرية
قالتي إزيك يا حبيبتي يا غلبوية
وأنا من طيبتي إفتكرتها بجد بتطمن عليا
شوية ولقيتها بتحكيلي ع البت شوقية
اللي عمرها في حياتها ما كان ليها علاقة بيا
وإزاي جوزها طلع راجل هفية
طلقها عشان مشهقتش شهقة الملوخية
بدأت تشتم فيه بطريقة هسترية
وأكنها هي اللي إطلقت، مش البت شوقية
شوية وقالت إيه الرجالة ديه؟
دول محصلوش حتي فراخ الجمعية!
وفجأة قربت مني شوية
وفكرتني إن أمي هتموت وتفرح بيا
وقالتلي مش كفاية لكاعة بقي يا تحية؟
على أساس مثلاً إن دي حياتها هي!
مانا برضه إستغربت داخلتها الأونطجية
عاملة نفسها قال إيه خايفة عليا
وأتاريها بتكلمني عن سنجاوي ابن الست فوزية
جارتنا القديمة من أيام شقة المنوفية
فضلت تشعر فيه وفيا
كأننا جزء من سينفونية كلاسيكية
ولما أعلنت رفضي بكل تلقائية
قالتي ليه؟ حد يفرط في جوازة زي ديه؟
ده عريس والله يا بنتي مية مية
واللا انتي في حد في حياتك يا عنَيّا؟
قوليلي ياختي ومتخابيش عليا!
ودي كانت المرة الخمسمية
اللي أقتل فيها في دماغي الست فتحية
وبعد ماكلنا سوا أكلة هنية
بصيت لقيت سنجاوي داخل عليا
وشايل في إيده كيسين ملوخية
وقال ايه جاي عايز شوية تقلية
هما للدرجة دي فاهمني غبية؟
إيه ياربي ده، دي عصابة مفترية!
والحكاية دي كل شوية تتكرر هي هي
أنا بجد زهقت من عيلتي الرجعية
اللي عمرهم ما سابوا الفرصة ليا
إني أعيش حياتي بشوية إيجابية
طبعاً فيه ناس كتير من نفس النوعية
وبيعملوا بالضبط زي مابتعمل الست فتحية
بيدخلّوا في حياة الناس بدون أي وجه أحقية
نفسي بقي نخلص منهم ونعيش في حرية
أحب أوصللهم رسالة نهائية
إنتوا بجد جبتولي عقدة نفسية
عيب اللي انتوا بتعملوا ده، إتقوا الله فيا
عشان قربت أرتكب جريمة وأخلّص البشرية
من قرفك يا ولية إنتي وهي وهي وهي
